Evig motbakke til Store Midtmaradalstinden

Frå Søre mot Vetle og Store Midtmaradalstinden

På veg til Sandane vart det endeleg rom for soloavstikker til den lenge etterlengta og sagnomsuste Store Midtmaradalstinden! Parkerte og snikovernatta i bilen på Hjelle parkering (som har toalett!) og sykla optimistisk avgårde kl 07.50 mot Hjelle gard. Ankom idylliske Stølsmaradalen etter herleg multelunsj ca kl 10.30 der eg møtte to som hadde overnatta, utan ambisjonar om topptur. 

Åleine vidare mot toppen gikk tempoet ned. Dette var verkeleg seriøst drøyt langt, og konstant oppover. La igjen sekken eit stykke forbi Stølsnosi (med fantastisk Hurrungane-utsikt), og gikk vidare med lett vest for om mogleg å auke tempoet litt.

Ingenting å utsette på utsikten frå Stølsnosi. Store Midtmaradalstinden kneiser litt til venstre for midten, med den lavare Vetle til høgre for seg og Søre under den igjen. Laaangt igjen...

Fekk besøk av eit yngre par i høgt tempo med joggesko. Verkeleg greitt å vere tre opp dei tre klyvepartia til Søre, Vetle og Store, og toppen vart nådd kl 16.20. Litt vrient å finne riktig veg opp til Søre og ned frå Vetle, men med litt ro og prøving så gikk det greitt.

Siste klyving til topps

Storen var til å ta og kjenne på herifrå, der den viste si kanskje flottaste og mest majestetiske side.

Den noko meir kjende naboen, Store Skagastølstind

Nedturen gikk fint, og det var freistande å ta ei natt på Stølsmaradalen (som dei andre to frå toppen), men vidare nedover bar det (med nokre multestopp) til eg ankom bilen kl 21.45 etter fantastisk herleg trilletur på sykkelen ned grusvegen over dei tre bruene.

I bratta ned frå Stølsmaradalen klarte eg å dunke meg i tversgåande tre to ganger mens eg fokuserte nedover... i tillegg til litt raude og såre tær etter mykje nedovergange. Men den gode kjensla råda definitivt.
Ein verkeleg flott tur i fantastiske omgivnader og kjekt tinderanglingsselskap på toppane, med mektige Vettisfossen i sidesynet i dei nedre partia av turen. Multemyrene (på ca 800m) var heller ikkje verst:)

Nedover mot Vettisfossen

Vel nede bar det vidare med bil til Sandane til sein middag hos ho mor kl 01.30👍